මම කියවපු පොත්

ලෝක ඉතිහාසයේ නොමැකෙන කළු පැල්ලමක් සනිටුහන් කළා වූ සිදුවීමක් වශයෙන් දෙවැනි ලෝක සංග‍්‍රාමය ද ඒ හා බැදුණු දස ලක්ෂ සංඛ්‍යාත ජන සංහාරය සැළකිය හැකි වන්නේය..1934 වර්ෂයේදී ඇඩොල්ෆ් හිට්ලර් විසින් ජර්මනියේ බලය අල්ලාගත් පසු ජර්මනියේ ක්‍රියාත්මක වූ සියලුම දේශපාලන පක්ෂ තහනම් කළේය..තමන්ට විරුද්ධ සහ විරුද්ධ වෙතැයි සැකකළ සියලුම දේශපාලඥයින්, බුද්ධිමතුන් සහ යුදෙව්වන් කෲර ලෙස ඝාතනය කරනු පිණිස හිට්ලර් හා ඔහුගේ නට්සිවාදී පක්ෂය " අවසන් විසදුමක්  "යෝජනා කොට ක්‍රියාවට නැංවීය..එය " හොලෝකෝස්තය (The Holocaust) " හෙවත් මහා මිනිස් සමුල ඝාතනය වශයෙන් හැදින් වෙයි..දෙවන ලෝක සංග්‍රාමයට කිසිසේත් සම්භන්ද නැති ළමයින් ගැහැනුන් ඇතුළුව කෝටියකට අධික විවිධ ජාතීන්ට අයත් සිරකරුවන් මිනීමරු නට්සිවාදීන්ගේ ඝාතක බලඇණිය වන එස්.එස් සේනාංකය හා එයට අයත් රහස් පොලිසිය වූ " ගැස්ටාපෝ " නමින් හදුන් වන ඒකකය විසින් ඝෘජුවම පාලනය කල සිර කදවුරු තුලදී ඝාතනය කෙරුණි.

ජර්මනියේ වයිමාර් පළාතේ එට්ස්බර් කදු මුදුනේ බුක නමැති ගසින් පිරි වනය කපා ගොඩනගන ලද " බුකන්වෝල්ඩ් " සිර කදවුරෙහි බොහොමයක් රැදෙවියන් ජර්මානු කමියුනිස්ට් පක්ෂ සාමාජිකයින්ගෙන් සමන්විත වූ අතර යුදෙව්වන් ද ඇතුළත්ව ජාතීන් 14කට අයත් විවිධ තරාතිරම්වල මිනිසුන් ඉතා විශාල සංඛ්‍යාවක් ගාල් කරනු ලැබ සිටියෝ ය..මේ කතන්දරයේ කාල වකවානුව වන විට එහි සිට ඇති සිරකරුවන් සංඛ්‍යාව 86,000 ඉක්මැවූ බව වාර්තා වෙයි..දෙවන ලෝක යුද්ධය අවසාන භාගයේ පෝලන්ත සිරකරුවෙකු විසින් රහසින් සුට් කේසයක දමා කදවුර තුලට රැගෙන එන කුඩා දරුවෙකු සිරකරුවන් විසින් ජීවිත පරිත්‍යාගයෙන් ආරක්ෂා කර ගත් සැටිත් යුද්ධය අවසන් වන්නට මසකට පෙර 1945 අප්‍රේල් 11 වන දින ඔවුහු සන්නද්ධ අරගලයක් මගින් බුකන්වෝල්ඩ් සිර කදවුර බිද නිදහස ලබා ගත් සැටිත් මේ කතාවෙන් පැවසෙයි.

බුකන්වෝල්ඩ් සිර කදවුරේ අට වසරක් සිරබත් කෑ " බෲනෝ අපිට්ස් " විසින් තම සත්‍ය අත්දැකීම් පදනම් කරගනිමින් 1958 දී ජර්මන් බසින් රචිත Nackt unter Wolfen නම් නවකතාව එඩිත් ඇන්ඩර්සන් නමැති එරට විසූ ලේඛිකාව විසින් Naked Among Wolves නමින් 1963 වසරේ ඉංග්‍රීසි භාෂාවට පරිවර්තනය කරන ලදී..ඉන්පසු ලොව භාෂා අති මහත් සංඛ්‍යාවකට පරිවර්තනය වූ  Naked Among Wolves කෘතිය සිංහල භාෂාවට පරිවර්තනය කරන්නේ ජ්‍යෙෂ්ඨ පරිවර්තක සිරිල් සී. පෙරේරා මැතිතුමා අතිනි..කෘරත්වය,වික්‍රමය,පලායාම සහ ජීවත් වීමට ඇති අයිතිය පිලිබදව කෙරෙන අනුස්මරණිය කතන්දරයක් වන " වෘකයන් අතර නග්නව " සිරිල් සී. පෙරේරා මැතිතුමාගේ තවත් විශිෂ්ඨ පරිවර්තනයකි.

ඔන්න සති දෙකක් තිස්සේ සොෆීගේ ලෝකය කියවල අද ඉවර කළා...ගොඩක් වටින පොතක්...දර්ශනය ගැන ලියැවුන නවකාතාවක් ලෙස තමා මේ පොත ලෝක සාහිත්‍යයේ හැඳින්වෙන්නේ...දර්ශනය වගේ බරසාර මාතෘකාවක් ගැන ලියවිලා තියනව කිව්වම මාත් ටිකක් අදිමදි කලා මේ පොත මිලදී ගන්න...හැබැයි "සොෆීගේ ලෝකය" කියවපු කවුරුත් වගේ දන්නවා මේ පොත කොච්චර රසවත්ද කියලා...කියවල බලන්නකෝ පොතේ පසු කවරයේ මොනවද කියන්නේ කියලා..."" අවුරුදු දහහතරක් වයසැති සොෆී ආමන්ඩ්සන් නමැති නොවීජියන් පාසල් ශිෂ්‍යාවකට එක දවසක තම තැපල් පෙට්ටිය තුළින් පුදුම සහගත ලිපි දෙකක් හමු වෙයි. ඒවායේ ලියා ඇත්තේ ප්‍රශ්න දෙකකි, ඔබ කවුද? ආවේ කොහෙන්ද?
මේ ලිපි ලියූ පුද්ගලයා ගුප්ත දාර්ශනිකයකු වූ ඇල්බර්ටෝ නොක්ස්ය. මේ සිත් අවුල් කරවන ප්‍රශ්න දෙක, ප්‍රාග් සොක්‍රටීස් යුගයේ පටන් සාත්‍රෙ දක්වා බටහිර දර්ශන ඉතිහාසය පුරා අසාමාන්‍ය චාරිකාවකට මුල පුරන්නක් වෙයි. ඉතාමත් සිත් අදනාසුලු, විනෝදාත්මක ලිපි පෙළක් ඇසුරින්ද ඉකිබිති පෞද්ගලිකව පැමිණීමෙන්ද ඇල්බර්ටෝ නොක්ස්, මනුශ්‍ය ශිෂ්ටාචාරය උදා වූ තැන පටන් දාර්ශනිකයන්ගේ විමසීමට යෙදුණ මූලික ප්‍රශ්න පිළිබඳ සොෆීගේ විමංසනාත්මක මනස පුබුදු කරවයි ""

මේ පොත අපි හුගදෙනෙක් කියවල තියෙන ආකාරයේ නවකතාවක් නම් නොවෙයි...අනික එක හුස්මට කියවන්න පුළුවන් පොතකුත් නෙවෙයි...මොකද මම එහෙම කියන්නේ දර්ශනය වගේ මාතෘකාවක් එක්ක ගොඩනැගෙන මේ කතාව අවුරුදු 3000 ක් තරම් ඈත අතීතයකට අපිව කැදවාගෙන යනවා...ඩෙමොක්‍රිටස් , සොක්‍රටීස් , ප්ලුටෝ ,ඇරිස්ටෝටල් ,ඩෙකාට් ,ස්පිනෝසා ,ලොක් ,හියුම් ,බර්ක්ලේ ,බියැහ්කෙලී ,කාන්ට් ,හේගල් ,මාක්ස් ,ඩාවින් ,ෆ්‍රොයිඩ් වගේ මහා දාර්ශනිකයන් එක්ක ලෝක දර්ශන ඉතිහාසයේ අල ගිය - මුල ගිය  තැන් ඉතාමත් සිත් ඇදගන්නාසුලු ආකාරයට විස්තර කරන හින්ද සෑම ජේදයක් අවසානයේදීම අපිට හිතන්න දහසකුත් දේ මනසට ලැබෙනවා...ඒක හින්දා ටිකක් ඉවසීමෙන් හිමින් සීරුවේ කියවන්න ඔනේ පොතක්...ඒ වගේම අපි ජීවිතය ගැන නොහිතන නොදකින පැතිකඩයන් විවර කරදීමට "සොෆීගේ ලෝකය" සමත් වෙනවා...උදාහරණයක් කිව්වොත්  එක දවසක් සොක්‍රටීස් හැම ජාතියේම භාණ්ඩ තියන වෙළදසලක් දිහා බලන් ඉදල අවසානයේදී මෙහෙම කිව්වලු " මට ඕනේ නැති දේවල් කොයි තරම් තියනවද! " කියලා , " ඩයජිනිස් අන්ටිස්තිනිගේ ශිෂ්‍යයෙක්. ඔහු පීප්පයක වාසය කිරීමද ලෝගුවකුත් සැරයටියකුත් පාන්මල්ලකුත් හැරෙන්නට වෙන කිසිම දෙයක් අයිතිව නොසිටීමද ගැන ප්‍රසිද්ධයි.(එම නිසා ඔහුගෙන් සැපත සොරා ගැනීම ලේසි නෑ) එක දවසක් ඔහු තමාගේ පීප්පය ළග වාඩි වී හිරු රැස් නාමින් ඉද්දි මහා ඇලෙක්සැන්ඩර් එතැනට ආවා...මහාධිරාජයා ඔහු ඉදිරියේ හිටගෙන ඔහුගෙන් ඇහුවා මොනවා හරි දෙයක් කරලා දෙන්න ඕනෑද කියලා...ඔහු ආශා කරන දෙයක් එහෙම තියනවද ? එතොකොට ඩයජිනිස් කිව්වා " ඔව් පැත්තකට වෙන්න ඔබ හිරු රැස් මුවා කරනවා ". මේ ආකාරයට ඩයජිනිස් පෙන්නුවා තමා ඉදිරියේ ඉන්න ශ්‍රේෂ්ඨ මිනිසා තරම්ම තමාද ධනවත් බව.."" ඉතින් පිටු 607 ක් පුරාවට ගලායන මේ නවකථාවේ දැනුම සහ විනෝදයෙන් සපිරිනු මෙවන් පරිච්ඡේද ගණනාවක්ම සමන්විතයි...

පෝස්ටුව අවසන් කීරිමට මත්තෙන් මෙමෙ කෘතියේ පරිවර්තිකාව වූ රාණි සේනාරත්න රාජපක්ෂ මහත්මිය ගැනත් විශේෂයෙන්ම සදහන් කල යුතුමය ..සරල සුගම්‍ය භාෂාවකින් පරිවර්තනය කර ඇති මේ  වටිනා කෘතිය සිංහළ පාඨකයන් හට දායාද කිරීමෙන් ඇය අමිල සේවයක් සිදුකර ඇත.එමෙන්ම විදර්ශන ප්‍රකාශනයක් ලෙසින් එළිදැක්වුණු මේ කෘතියේ ඝනකම් පිටකවරක් සහිත බාහිර නිමාවද කෘතියේ අන්තර්ගතය මෙන්ම අතිවිශිෂ්ඨය , සිත්ඇදගන්නා සුළුය .....අවසාන වශයෙන් "සොෆීගේ ලෝකය" නම් හොඳම පොතක්..........නිවී සැනසිල්ලෙ කියවන්න.